今日係屋企執野，發現大約十年前，我係一個網站做記者時o既手稿，個筆名叫[格價專家]，唔知你地有無睇過呢？我睇返十年前o既我都好爆吓！以下係其中一份比大家睇下：

      開佐3年都無人知o既腦場…電腦33

     筆者今日病佐！可能同近日天氣有關，所以大家都要保重身體(嘩！十年前啲空氣已經咁差)，本來想係屋企抖下，但係腦場o既變化同價錢o既上落，情况就好似股市咁日日唔同！要做到足不出門，能知天下事，對我地寫稿依行黎講，根本無可能(病都要開工，緊係好高人工)。再加上有你地o既支持(十年前已經有fans)，所以我格價專家，走佐去屋企附近o既腦場電腦33八下(負資產，負到而家)。

    話時話，依個腦場開佐3年有多，筆者每日經過都見門口個看更亞叔好似個導遊咁：係我地o既左手面係高登同黄金中心，前面係新高登，依度下面係黄金……好多人都以為依度係高登o既一部份，亦好多人淨係知道樓上有間波樓叫[銀X]。但係好少人知道，第一間[天空店]就係度開o既，難得見倒老板娘嘉露，八下筍料，PalmVx賣3580比旺電老胡平300(買部palm都要三千幾？)，推介sony 505ve 賣13000，而505vx賣16800果然有料到！

     中段[華X]係代理winfast[景X]o既合作店，老細華叔賣o既winfast產品以最齊同最新，價錢仲包你話平！(因為我格價專家仲要留返條命，繼績同大家扢料，所以價錢唔出得街)(連命都無咁跨？) 隔離[莫X]係三菱monitor o既代理，依度無野賣，亦都無推介，因為係陳列室，有都貴到嚇死你！死角位亞偉哥間鋪係賣原裝日本三仔咸碟o既，筆者有心水，不過唔方便推介，要推介就自己去揾佢。