一大早電話响起！唔出奇做地產依行電話唔响，就可以收工等死！ 我對住電話：「喂？喂？」幾聲，仍然無人回答，我就收佐線，唔夠五分鍾，電話又响起，仍然無來電顯示，我又再對住電話：「喂？喂？」突然傳黎一把好高音o既男聲！佢就話：「萊！萊！萊…..」吓？我心諗：「你UP乜野？萊萊……？」我又收佐線。

     大半個鐘頭後，電話又响起，今次我接電話都未講野，另一邊就好大聲咁叫：「roy！roy！roy……」，我就話：「係，我係roy，你係邊位？」，另一邊又好大聲咁講：「救命呀！亞爸係醫院仲未醒呀！救命呀！救命呀……」，電話不斷傳黎叫救命聲！當時我個心離一離，究竟你係邊個？點解凈係識叫救命？我再問佢：「唔好叫救命住，你係邊個？你係邊度？」佢就話：「聯合呀！我係亞潻呀！快D黎救命呀！」我就話：「吓？你唔係秀茂坪屋企，你無事呀？」亞潻就話：「我無事呀！而家快D黎救我亞爸呀！搭的士呀……」收線後，我真係飛的去佐聯合醫院。

    去到醫院果陣，我真係見倒亞潻，見佢坐係電話亭隔離，好焦急同不安，佢一見倒我就拉佐我入病房，原來世伯突然爆血管，情况就好似之前我外父一樣，醫生都話應該過唔倒今晚，要有心埋準備。我問佢究竟發生乜野事？點解會咁，亞潻就一五一十話比我知。原來亞潻十年前有爭出面錢，亦都唔少，十年黎一直有收數佬上門搵佢收錢，只不過亞潻佢自已傻佐唔知，次次都係佢老豆頂住，不過，世伯今次終於頂唔住，我都好明白，我以前都比收數佬追過債，真係好煩，好大壓力，何况世伯咁大年紀。

     對話中，我知道亞潻已經完全清醒，唔再隱閉！因為佢問我借錢，都成十皮野，之前一定借，而家就難啲……。床頭部機突然响起，醫生同姑娘走入黎急救‧亞潻同我係度等，最後世伯都離開佐我地，我見亞潻一臉無奈，好自責！我見佢眼裡面開始燃起怒火，我知道會有大事發生，因為佢o既霸氣返黎，亞潻o既鬥心比我比任何一個人強，依個係佢十年前不敗o既神話！我相信佢o既神話會再現！如果世伯o既死會另到亞潻再生，我諗世伯都會安心o既離開，世伯，安息吧！

送上Rocky Balboa 既Going The Distance